ಕೊಡವ ಮಾದರಿ ಜನಾಂಗ

ಕೊಡವ ಮಾದರಿ ಜನಾಂಗ

ನಂಬಿಕಸ್ಥಂಗ, ಸ್ನೇಹಪರ, ಕೀರ್ತಿವಂತಂಗ
ಕೊಡವ ಸತ್ಯವಂತಂಗ, ನಂಬಿಕಸ್ತಂಗ, ಸ್ನೇಹಪರ, ಆತಿಥ್ಯಕಾರಿ ಪಿಂಞ ಪ್ರಾಮಾಣಿಕತೆ ಉಳ್ಳವೂಂದ್ ಪೊರದೇಶತ್ ರ ಪೆರ್ತ್ ಮಾನವ ಶಾಸ್ತ್ರಜ್ಞಂಗ ತುದಿಚಿತ್ ದಾಖಲೆ ಮಾಡಿ ಬೆಚ್ಚಿತ್.

ಕೊಡವ ಹಠಾವಾದಿಯಳಲ್ಲ
ಕೊಡವಡಲ್ಲಿ ಕಂಡ್ ಬಪ್ಪ ಒರ್ ವಿಶೇಷತೆನೆ ಎಲ್ಲಾರೂ ಮೆಚ್ಚುವ. ಕೊಡವ ಜಾತಿ ಧರ್ಮತ್’ರ ವಿಚಾರತ್ ಹಠವಾದಿಯಳಲ್ಲ. ಏದ್ ಗುರುನೋ ಮಠತ್’ನೋ ಮಂಡೆಲ್ ಬೆಚ್ಚಂಡವೂ ಅಲ್ಲ. ತಾಂಡ ಧರ್ಮೇ ಮೆಲ್ಂದ್ ಬೋರೆ ಧರ್ಮತ್’ನ ಚೌಟಿ ತಾತುವ ಸ್ವಾರ್ಥ ಬುದ್ದಿ ಏದ್ ಕಾಲತೂ ಬಂದಿತಿಲ್ಲೆ. ಇಂಞೊರ್ ಜನಾಂಗ ತ್ ರ ಆಚಾರ ಸಂಪ್ರ ದಾಯ ತ್ ನ ಅನುಕರಣೆ ಮಾಡಿಯಂಡ್ ಅದ್ ತಾಂಡದೇ ಎಣ್ಣಿಯಂಡ್ ವಾದ ಮಾಡುವ ಞಾಣ ಇಲ್ಲತ ಬಂಡ ಕಳಿ ಕ್ ಒತ್ತಾಸೆ ಕೊಡವ ಕೊಡ್ ಪ್ ಲೆ. ಇಂದತ ಕೊಡವ ಜನಾಂಗತ್ ನ ಒಂದ್ ಮಾಡಿತ್ ಕಾಪಾಡೊಂಡುಂದ್ ಎಚ್ಚಕೋ ಜನ ಪೊರಟತೆಂಗಿಯೂ ಅವಂಡ ಜನಾಂಗತ್ ನ ವೃದ್ದಿ ಮಾಡುವ ದೃಷ್ಠಿ ಒನ್ನಾಂದೂ ಅವಂಡ ನಾಗರಿಕ ಜವಾಬ್ದಾರಿಕ್ ಅಡ್ಡ ಬಂದಿತ್ತಿಲ್ಲೆ. ಆನಗೊಂಡ್, ಕೊಡವ ಜನಾಂಗ ಇಕ್ಕಾಕಣೆಕ್ ನಡ್ಂದ್ ಬಂದ ಬಟ್ಟೆ ನಂಗಡ ದೇಶತ್ ರ ಬೋರೆ ಜನಾಂಗಕ್ ಮಾದರಿ ಆಯಿತ್ ಉಳ್ಳದ್ ಪೆರ್ಮೆರ ವಿಷಯ. ಇದ್ ನಾಗರಿಕ ಜನಾಂಗಕ್ /ಮಾನವ ಕುಲಕೋರ್ ಓರ್ ಆದರ್ಶ ಎಣ್ಣ್ ವಾನ ಖನಪಟ್ಟ ಎಳ್ತ್ ಕಾರ ತುದಿಚಿತ್ ದಾಖಲೆ ಮಾಡಿ ಬೆಚ್ಚಿತ್.

ಕೊಡವ ಎದೆಗಾರಿಕೆಯುಳ್ಳ ಪಡೆಯಾಳಿಯ, ಮಾರಾಟಕುಳ್ಳವು ಅಲ್ಲ
ಕೊಡವ ಎದೆಗಾರಿಕೆಯುಳ್ಳವು, ಏದ್ ಕಾಲತ್ ಲೂ ಪಣತ್ ರ ಆಸೆಕ್ ಪಡೆಪೊತ್ತವು ಅಲ್ಲ. ಪಾಲೇರಿ ರಾಜಂಗಡ ಆಡಳಿತತೂ ಪಡೆಯಾಳಿಯಕ್ ಪಣ/ಸಂಬಳ ಇಂಜಿಲೆ. ಪಡೆ ಎಣ್ಣುವದ್ ತಾಂಡ ಪುಟ್ಟ್ ಗುಣತ್ ಲ್ ಬಂದದ್. ಪಡೆಲ್ ಜೈಸುವದೂ, ಪಡೆಪೊತ್ತ್ ಚಾವದೂ ದಂಡಾನೋ ಗೌರವತ್ ಕಂಡವು. ಆಣ್ ಪಡೆ ಪೊತ್ತಿತ್ ಚಾವಂಡು, ಪೊಣ್ಣ್ ಪೆತ್ತಿತ್ ಚಾವಂಡು. ಇದ್ ಪಂಡ್ಂಜೇ ಬಂದ ಪಳಂಜೊಲ್ಲ್. ಪಡೆಭೂಮಿಲ್ ಚತ್ತ ಆಣ್ ಕ್ ವೀರ ಚಾವೂಂದ್, ಪೆತ್ತಿತ್ ಚಾವ ಪೊಂಗಕ್ ಕೀರ್ತಿ ಉಂಡ್ಂದ್ ನಂಬ್ ನ ಜನಾಂಗ. ಇನ್ನನೆ ಕೊಡಗ್ ರ ರಕ್ಷಣೆಕ್, ಪಾಲೇರಿ ರಾಜಂಗಡ ರಕ್ಷಣೆಕ್ ನೈಚ ಪಡೆಯಾಳಿಯಳ, ಅಯಿಂಗ ಶತ್ರು ದೇಶ ತ್ ಲೂಟಿ ಮಾಡುವ ಇಂಜತ್ಂದ್ ಇಕ್ಕತ ಕೆಲವು ಎಳ್ತ್ ಕಾರಂದ್ ಮುಖವಾಡ ಇಟ್ಟಂಡ್ ಅಪಪ್ರಚಾರ ಮಾಡುವಕ್ ಬುಕ್ಕ್ ಎಳ್ ದಿತ್ ಡಾಕ್ಟರೇಟ್ ಪದವಿ ಪಡಂದ ಪಟಿಂಗಂಗಡ ಮನದಾಳತ್ ಬೇರಡ್ತ ಕಿಚ್ಚ್, ಸಮಾಜ ತ್ ನ ಒಡ್ಪಕ್ ಅಯಿಂಗಡ ಆಜೀವಪರ್ಯಂತ ದುರುದ್ದೇಶ ಪೂರಿತ ಪೇಚಾಟ ಸ್ಪಷ್ಟವಾಯಿತ್ ಕಾಂಬ.
ಪುತ್ತರಿ ನಮ್ಮೆರ ಸಮಯತ್ ಲ್ ಪರಿಯಕಳಿ ಎಣ್ಣುವ ಓರ್ ಪೊಯ್ತ್’ಪಡೆರ ಪ್ರದರ್ಶನ ಉಂಡ್. ಅದ್ ಓರ್ ಪಡೆವಿದ್ಯೆ ಆನಕಲೂ ಕೊಡವಂಗ್ ಅದೋರ್ ಕಳಿ. ಕೊಡವಡ ಶೌರ್ಯ, ಪಡೆವಿದ್ಯೆ ಎಲ್ಲಾ ತಾಂಡ ದೇಶ ರಕ್ಷಣೆಕಾಯಿತೂ, ಒಕ್ಕಡ ಕೇಳಿಕಾಯಿತೂ, ಪಾಲೇರಿ ರಾಜಂಗಡ ಸೇವೆಕಾಯಿತೂ ಮಾತ್ರ. ಪಣಕಾಯಿತ್ ಪಡೆ ಪಡೆಪೊತ್ತವು ಅಲ್ಲ. ಇದ್ ನ ಬ್ರಿಟಿಷ್ ಕಾರ ಅರ್ಂಜಿತೂ, ಅಯಿಂಗಡ ಅನುಭವಕ್ ಬಂದಿತೂ ದಾಖಲೆ ಮಾಡಿ ಬೆಚ್ಚಿತ್. 1837 ಅಮರಸುಳ್ಯ ಕಾಟಕಾಯಿ ಪಡೆಲ್ ಶತ್ರುವ ಸರಕಾರತ್ ರ ಖಜಾನೆ ದರೋಡೆ ಮಾಡ್ ನ ಬಲ್ಯಗಂಟ್ ರ ಪಣತ್ ನ ಶತ್ರುವಡ ಕೈಂಜಿ ವಶಪಡ್ ತಿಯಂಡ್ ಸರಕಾರಕ್ ಒಪ್ಪಚ್ಚಿಟ್ಟತ್. ಬ್ರಿಟಿಷ್ ಕಾರ ಆ ಪಣತ್ ನ ಇನಾಂ ಆಯಿತ್ ಕೊಡ್ ಪಕ ‘ನಂಗ ಪಣಕಾಯಿತ್ ಪಡೆ ಪೊತ್ತವು ಅಲ್ಲ’ ಎಣ್ಣಿತ್ ಆ ಪಣತ್ ನ ಬಯ್ಯಕ್ ಟ್ಟದ್ ಬ್ರಿಟಿಷ್ ಕಾರಳ ಬೆರಗಾಯಿಚಿಟ್ಟಿತ್. ಇದ್ ಕೊಡವ ಳ ವಿಶ್ವಾಸಾರ್ಹ ಜನಾಂಗಂದ್ ಜಗತ್ತೇ ಗುರುತಿಚಿಟ್ಟ ಸಂಧರ್ಭ.
19 ನೇ ಶತಮಾನತ್ಂಜಿಪ್ಪರ ಸೈನ್ಯತ್ ಲ್ ಕೊಡವಡ ಸಂಖ್ಯೆ ಪೆರ್ತ್ ದುಂಬಾ ಉಂಡ್.

ಮತಾಂತರತ್ ರ ಕೆಣಿಕ್ ಬಲಿಯಾಗತ ಜನಾಂಗ
ಬ್ರಿಟಿಷ್ ಪಿಂಞ ಜರ್ಮನಿರ ವಿದ್ವಾಸಂಗ ಕೊಡವು ಕ್ ಬಂದ ನೇರಾನ ಉದ್ದೇಶ ಕೊಡವಳ ಕ್ರೈಸ್ತ ಮತಕ್ ಮಾತುವದ್. ಕೊಡವ ಪದ್ದತಿ, ಪೊರಪಾಡ್, ಸಂಪ್ರದಾಯತ್’ನೆಲ್ಲ ಅವು ಪೆರ್ತ್ ಮೆಚ್ಚಿತ್ ಎಳ್ದ್ ಚೆಂಗಿಯೂ ಕೊಡವಡ ಸಂಸ್ಕೃತಿರ ಅಭಿವೃದ್ದಿಕ್ ಸಹಾಯ ಮಾಡ್ ನದ್ ಕಂಡ್ ಬಪ್ಪ್’ಲೆ. ಮತಾಂತರ ಮಾಡುವದೊಂದೆ ಅಯಿಂಗಡ ಗುರಿ ಆಯಿತಿಂಜತ್. ಕೊಡವ ಬೊಳ್ಳೆಕಾರಡ ವಿದ್ಯೆ, ಪೊರಪಾಡ್, ಜೀವನತ್’ರ ಮಾದರಿ, ಊಟೋಪಚಾರತ್ ನೆಲ್ಲಾ ಆಧುನಿಕ ಜೀವನಶೈಲಿರ ಕಾರಣತ್ ಬಳಕೆ ಮಾಡ್ ಚೇಂಗಿಯೂ ಬೋರೆ/ಕ್ರೈಸ್ತ ಮತಕ್ ಕೂಡ್ ಲೆ. ಒಬ್ಬ ದಂಡಾಳ್ ಕೆಣಿಕ್/ಆಸೆಕ್ ಬಲಿಯಾಯಿತ್ ಕೂಡ್ ಚೇಂಗಿಯೂ ಮನಸ್ಸ್ ಕ್ ತೃಪ್ತಿ, ಜೀವನತ್ ಶಾಂತಿ/ ಸಹಬಾಳ್ವೆ ಕಂಡ್ ಲೆ, ಆ ಮತತ್ ಲೇ ಉಳ್ಂಜಿಲೆ. ತಂಗಡ ಅಜ್ಜ ಮುತ್ತಜ್ಜಂಗಡ ಕಾಲತ್ಂಜಲೇ ದೈವದತ್ತವಾಯ್ತ್ ಪ್ರಕ್ರತಿರ ಸಂಬಂಧತ್ ಬೊಳಂದ್ ಬಂದ ಪದ್ದತಿ ಪರಂಪರೆನ ಬುಡುವಕ್ ತಯಾರಿಂಜಿಲೆ. ಕೊಡವಳಾಯಿತೇ ಉಳಿಯಂಡೂಂದ್ ಅಯಿಂಗಡ ಆಶೆ. ಅಕ್ಕತ ಸರಕಾರ ಪಿಂಞ ಪಾದ್ರಿಯ ಎಚ್ಚಕೇ ಆಸೆ ಕಾಟಿತ್ ಪ್ರಯತ್ನ ಪಟ್ಟಕಲೂ ಕೆಣಿಕ್-ಆಕರ್ಷಣೆಕ್ ಬಲಿಯಾಗತೆ ಕೊಡವತನತ್ ನ, ಸಂಪ್ರದಾಯ ಸಂಸ್ಕೃತಿನ ಬುಡತೆ ಬಾಳ್ ನವುಂದ್ ಎಣ್ಣುವಕ್ ಪೆರ್ಮೆರ ವಿಷಯ.